Policia e Durrësit ka arrestuar një 22-vjeçar të shpallur në kërkim për plagosje të rëndë me sende të forta, në kuadër të operacionit policor të koduar “Brothers”.
Shtetasi Danjel Mborja, 22 vjeç, banues në Durrës, u kap dhe u vu në pranga pas vendimit të Gjykatës së Shkallës së Parë të Juridiksionit të Përgjithshëm Durrës, e cila më 16 tetor 2023 kishte caktuar ndaj tij masën e sigurisë “Arrest me burg”. Ai akuzohet se më 13 gusht 2023, në bashkëpunim me vëllain e tij, Myslym Mborja, ka dhunuar rëndë shtetasin Sh. Ç., duke i shkaktuar plagë të rënda.
Operacioni u zhvillua nga Sektori i Krimeve të Rënda në bashkëpunim me shërbimet operacionale të DVP Durrës, në kuadër të planit për kapjen e personave të shpallur në kërkim dhe goditjen e veprimtarive kriminale.
Ndërkohë, vijon puna për lokalizimin dhe arrestimin e vëllait tjetër të përfshirë në ngjarje.
Materialet i kaluan Prokurorisë pranë Gjykatës së Shkallës së Parë të Juridiksionit të Përgjithshëm Durrës për veprime të mëtejshme.
©️zërionline
