Një skandal i madh dhe i njohur në sektorin e ndërtimit ka përfunduar në dyert e gjykatës së Durrësit. Prokuroria ka mbyllur hetimet për biznesmenin Ahmet Tusha dhe kompaninë e tij “Albion Construksion” sh.p.k. që akuzohen për mashtrim me pasoja të rënda në 25 raste, duke përvetësuar mbi 2 milionë euro nga qytetarët që blenë apartamente dhe njësi tregtare që nuk u morën kurrë në dorëzim. Skema e mashtrimit ishte denoncuar edhe nga emisioni investigativ “Fiks Fare”, që solli dëshmi tronditëse nga qytetarët e dëmtuar.
Pas një hetimi të gjatë, Prokuroria ka përfunduar dosjen dhe ka marrë të pandehur biznesmenin Tusha. Hetimet, të cilat nisën mbi një procedim penal të vitit 2022, çuan në caktimin e masës së sigurisë “Arrest në burg” në mungesë për biznesmenin i cili u shpall në kërkim 10 muaj më parë. Ai u arrestua nga autoritetet holandeze më 14 janar të këtij viti.
Përvecc veprës penale të “Mashtrimit” me pasoja të rënda Tusha dhe kompania e tij, si person juridic, akuzohen edhe për “Ndërtim të Paligjshëm”. Sipas Prokurorisë, në cilësinë e administratorit të kompanisë, Ahmet Tusha, ka lidhur kontrata sipërmarrjeje për ndërtimin e një objekti multifunksional në Durrës, ndërsa leja e ndërtimit nuk ishte zbardhur për shkak të mospagimit të detyrimeve ndaj Bashkisë Durrës. Ai ka shitur apartamente, njësi tregtare dhe garazhe përmes mashtrimit, duke mos dorëzuar asnjë prej tyre edhe pse pagesat ishin kryer sipas kontratave.
©️zërionline
