Sekuestrohen në portin e Ankonës, gati 58 tonë mbetje toksike që shkonin nga Shqipëria. Mediat vendase bëjnë të ditur se sasia importohej nga dy kompani italiane, që po përpiqej të shfrytëzonte këtë port për t’i futur ato në Itali.
Mospërputhja e asaj çfarë ishte deklaruar në dokumente me materialet reale që përmbanin kontejnerët e importuar nga Shqipëria ngjalli dyshimet e para. Nga analizat e kryera nga ekspertët e Agjencisë rajonale për Mbrojtjen e Mjedisit rezultoi se materialet e deklaruara si “mbetje alumini” përmbanin përqëndrim të lartë metalesh helmues si zinku, plumbi apo bakri që shkaktojnë dëme të konsiderueshme dhe afatgjata kryesisht në mjedisin ujor.
Sasia u zbulua falë operacionit “Metal Gate” që zhvillohet prej kohësh nga Guardia di Financa në portin e Ankonës. Operacioni ka për qëllim ndalimin e hyrjes së mbetjeve të jashtëligjshme urbane dhe deri më tani si pjesë e tij ishin sekuestruar 16 tonë mbetje të tilla.
©️zërionline
