Një operacion i gjerë hetimor është duke u zhvilluar nga Prokuroria e Durrësit pas sekuestrimit të 102 kontenierëve të dyshimtë që mbërritën në Portin e Durrësit më 28 tetor 2024 me anijen MOLIVA XA443A. Nisur nga interesi i lartë publik dhe dyshimet për përmbajtje të rrezikshme, Prokuroria ka dalë me një deklaratë zyrtare për të informuar mbi ecurinë e hetimeve dhe masat e marra deri më tani.
Një Hetim për Kontrabandë, Mbetje të Rrezikshme dhe Shpërdorim Detyre
Sipas Prokurorisë, çështja është regjistruar si procedim penal nr. 1596, me akuza që përfshijnë “Kontrabandën me mallra të ndaluara ose të kufizuara” (neni 171 i Kodit Penal), “Transportimin e mbetjeve” (neni 201/b) dhe “Shpërdorimin e detyrës” (neni 248). Hetimet po zhvillohen në disa drejtime, duke përfshirë jo vetëm origjinën dhe destinacionin e mallrave, por edhe rolin e institucioneve dhe individëve të përfshirë në këtë proces.
Çfarë përmbajnë kontenierët? Ky mbetet një nga misteret kryesore që hetuesit po përpiqen të zbardhin. Për të shmangur çdo rrezik mjedisor apo shëndetësor, Prokuroria deklaron se ka vënë në zbatim standardet më të larta ndërkombëtare për analizimin e materialeve të sekuestruara.
Mungesa e infrastrukturës në Shqipëri e shtyn hetimin drejt sektorit Privat
Një nga sfidat kryesore të hetimit ka qenë mungesa e laboratorëve shtetërorë me kapacitet për të analizuar substancat e dyshimta sipas protokolleve ndërkombëtare. Për këtë arsye, Prokuroria i është drejtuar Drejtorisë së Përgjithshme të Akreditimit për të identifikuar laboratorë privatë që plotësojnë standardet e nevojshme.
Kriteret për këto laboratorë përfshijnë:
– Akreditim për analizimin e metaleve të rënda, PAH-ve, Dioxina-ve dhe PCB-ve.
– Siguri të plotë në zinxhirin e ruajtjes së mostrave, për të shmangur manipulimet.
– Ekspertizë të specializuar në analizimin e mbetjeve industriale dhe toksike.
– Sisteme të avancuara të menaxhimit të të dhënave për gjurmueshmëri dhe transparencë.
Sipas Prokurorisë, një laborator i tillë tashmë është identifikuar dhe shumë shpejt do të nisë procesi i analizimit të mostrave.
Një hetim që kalon kufijtë: Ekspertë ndërkombëtarë përfshihen në çështje
Hetimi për këtë ngarkesë të dyshimtë ka tërhequr vëmendjen edhe të organizatave ndërkombëtare që luftojnë kundër trafikimit të mbetjeve të rrezikshme. Ishte organizata amerikane Bazel Action Network që e denoncoi rastin dhe së bashku me Mileukontakt Shqipëri, përfaqësuar nga eksperti Jim Puckett, kanë kërkuar të marrin pjesë si dëshmitarë dhe vëzhgues gjatë procesit të analizimit.
Prokuroria ka ftuar zyrtarisht Puckett që të japë dëshminë e tij më 4 dhjetor 2024 në Durrës. Për shkak të pamundësisë për të qenë i pranishëm fizikisht, ai ka dorëzuar provat e tij përmes emailit.
Çfarë do të ndodhë më tej?
Prokuroria e Durrësit ka konfirmuar se hetimet po vijojnë me intensitet dhe prioritet të lartë. Me përfshirjen e laboratorëve të specializuar dhe ekspertëve ndërkombëtarë, priten zhvillime të rëndësishme në zbardhjen e këtij rasti që ka ngritur shqetësime të mëdha për sigurinë mjedisore dhe ligjore në Shqipëri.
Në ditët në vijim, autoritetet kanë premtuar të mbajnë të informuar publikun mbi çdo zbulim të ri, ndërsa pyetja kryesore mbetet: A janë këta kontenierë një rast kontrabande të zakonshme, apo një sinjal alarmi për menaxhimin e mbetjeve të rrezikshme në vend?
V. Qyrfyçi
©️zërionline
