Me rastin e 22 prillit, Ditës Ndërkombëtare të Tokës, në ambientet e Qendrës Kulturore të Fëmijëve në Durrës u zhvillua një aktivitet ndërgjegjësues, ku nxënësit e shkollave të Bashkisë Durrës prezantuan një ekspozitë me makete dhe instalacione krijuese me temë “Toka, Planeti Ynë”.
Aktiviteti synoi të përcillte mesazhe të rëndësishme për edukimin mjedisor dhe promovimin e energjisë së rinovueshme, duke vendosur theksin te nevoja për të mbrojtur biodiversitetin dhe përdorimin e qëndrueshëm të burimeve natyrore. Përmes punimeve të tyre, fëmijët shprehën krijimtarinë, angazhimin dhe ndjeshmërinë ndaj çështjeve mjedisore që prekin të sotmen dhe të ardhmen e gjithë njerëzimit.
Në këtë aktivitet mori pjesë edhe kryetarja e Bashkisë Durrës, Emiriana Sako, e cila vlerësoi punën dhe përkushtimin e fëmijëve dhe mësuesve të tyre. Ajo theksoi se edukimi mjedisor duhet të fillojë që në moshë të vogël dhe se brezi i ri është çelësi për ndërtimin e një të ardhmeje të qëndrueshme dhe të gjelbër.
“Është frymëzuese të shohësh përkushtimin e këtyre fëmijëve ndaj Tokës”, u shpreh Sako.
Dita e Tokës shënohet çdo vit më 22 prill në mbarë botën dhe synon të ndërgjegjësojë qytetarët për rëndësinë e mbrojtjes së mjedisit dhe ruajtjes së planetit për brezat që vijnë.
©️zërionline
