Tre persona janë vënë në pranga pas finalizimit të një operacioni të koduar “Last Threat”, të zhvilluar nga specialistët e Seksionit për Hetimin e Krimeve ndaj Jetës dhe Pasurisë në Durrës, në bashkëpunim me Komisariatin e Policisë dhe forcat operacionale.
Në pranga kanë përfunduar shtetasja Alma H., 49 vjeçe, banuese në Spitallë, Durrës, e dyshuar për ushtrim prostitucioni dhe përfshirje në veprimtari shantazhi, si dhe bashkëpunëtori i saj, Robert Lamnica, 40 vjeç, nga Shënavlashi. I arrestuari i tretë është një 21-vjeçar Armand Hysa, i cili u kap me lëndë narkotike të llojit kokainë, të ndarë në doza të gatshme për shitje.
Hetimet zbuluan se Alma H. ofronte favore seksuale kundrejt pagesës në banesën e saj, ndërsa më pas, në bashkëpunim me Robert Lamnica, kërcënonte klientët me thikë për t’iu marrë shuma të mëdha parash. Njëri prej rasteve të dokumentuara tregon se viktima, shtetasi F. Ç., u shantazhua dhe iu morën 65,000 lekë pas një takimi intim, ndërkohë që Robert Lamnica kishte bërë edhe foto komprometuese të tij, të cilat përdoreshin për shantazh.
Sipas Policisë, Alma H. kishte ndërtuar një skemë shantazhi ku, pas akteve seksuale, klientët kërcënoheshin përmes fotove intime me publikim të mundshëm të tyre, nëse nuk paguanin shuma të konsiderueshme parash.
Operacioni kishte nisur një javë më parë dhe solli fillimisht arrestimin e 49-vjeçares. Ditën e djeshme u arrestua edhe Robert Lamnica, ndërsa gjatë këtij momenti ndodhej në shoqërinë e 21-vjeçarit A. Hysa, i cili u kap në flagrancë me drogë të ndarë në doza.
Gjatë kontrollit në banesën e 49-vjeçares, u sekuestrua edhe mjeti prerës i përdorur për kërcënimet.
Prokuroria vijon punën për identifikimin e personave të tjerë të shantazhuar dhe për dokumentimin e plotë të veprimtarisë kriminale të këtyre shtetasve. Materialet procedurale janë referuar për veprime të mëtejshme për veprat penale “Shtrëngimi me anë të kanosjes ose dhunës për dhënien e pasurisë” dhe “Prostitucioni”, ndërsa për 21-vjeçarin rëndon akuza për “Prodhim dhe shitje të narkotikëve”.
©️zërionline
