Me një vijë bregdetare që përqafon Adriatikun, trashëgimi mijëravjeçare dhe mikpritje që nuk lë askënd indiferent, Durrësi po shndërrohet në një nga yjet në ngjitje të turizmit mesdhetar. Shqipëria, e njohur dikur si një vend i izoluar, po del sot në skenën ndërkombëtare si një destinacion autentik dhe i paprekur, që tërheq gjithnjë e më shumë vizitorë nga e gjithë bota.
Përtej plazheve të gjata me rërë të artë, hoteleve cilësore dhe jetës së gjallë turistike, Durrësi ofron një mozaik të pasur kulturor e historik. Amfiteatri i lashtë romak, një nga më të mëdhenjtë në Ballkan, qëndron ende si dëshmi e lavdisë së dikurshme. Po ashtu, Torra Veneciane, Kalaja me muret mesjetare dhe rrugicat e vjetra krijojnë një atmosferë që të kthen pas në kohë. Edhe pse Muzeu Arkeologjik më i madhi në vend ndodhet aktualisht në rikonstruksion, vëmendjen po e tërheq një tjetër hapësirë ekspozuese, “Turistë të përgjuar”, një muze i pazakontë që sjell në zemër të qytetit realitetin e Shqipërisë komuniste dhe ndjesinë e të jetuarit nën vëzhgim.
Kjo përzierje unike mes historisë dhe atmosferës moderne shoqërohet me një kuzhinë të pasur e autentike: ushqime të freskëta deti, gatime tradicionale dhe produkte vendase që i japin shije çdo pushimi në këtë qytet bregdetar.
“Jam e surprizuar. Nuk e prisja kaq mirë”, thotë një turiste franceze pranë Torrës Veneciane, ndërsa bën foto. Një çift nga Gjermania shton: “Na pëlqeu qyteti dhe kafenetë e mira, Amfiteatri Antik dhe kjo shëtitore, shumë e gjallë.”
Rrugicat e qytetit, shëtitorja buzë detit dhe gjallëria e kafeneve janë kthyer në pika të preferuara për turistët që dëshirojnë të kombinojnë relaksin me zbulimin e kulturës.
Të dhënat nga operatorët turistikë dhe strukturat akomoduese tregojnë për një rritje të qëndrueshme të interesit ndërkombëtar. Durrësi po kthehet kështu në një portë hyrëse të pushimeve në Shqipëri, një qytet ku historia takon detin dhe ku çdo vizitor gjen një copë të vetën.
©️zërionline
