Në orët e para të mëngjesit të 25 majit, një ngjarje tragjike ka tronditur komunitetin shqiptar në Gjermani. Pranë qytetit Koblenz ndodhi një aksident i rëndë rrugor, ku janë përfshirë disa shtetas shqiptarë. Lajmi i trishtë u konfirmua nga Ministria për Evropën dhe Punët e Jashtme, e cila njoftoi me keqardhje se tre prej bashkatdhetarëve tanë humbën jetën si pasojë e përplasjes fatale, ndërsa katër të tjerë mbetën të plagosur dhe po marrin trajtim mjekësor në spitalet lokale.
Ambasada e Shqipërisë në Berlin dhe Konsullata e Përgjithshme në Mynih janë vënë menjëherë në kontakt me autoritetet gjermane, duke ndjekur nga afër situatën dhe zhvillimet në terren. Strukturat tona konsullore kanë ofruar ndihmën e tyre për qytetarët e prekur, duke qëndruar pranë tyre në këto momente të vështira.
Hetimet mbi shkaqet e aksidentit janë ende në vijim, ndërsa institucionet shqiptare janë të angazhuara për të siguruar mbështetje dhe përkujdesje për familjarët e viktimave dhe të plagosurve.
Ministria për Evropën dhe Punët e Jashtme shprehu ngushëllimet më të thella për familjet që kanë humbur më të dashurit e tyre dhe uron shërim të plotë për të lënduarit.
©️zërionline
