Numri i rasteve të kancerit tek të rinjtë po rritet me shpejtësi, veçanërisht për ata nën 50 vjeç. Sipas hulumtimeve të shkencëtarëve britanikë, shkalla e kancerit në mesin e britanikëve të moshës 25 deri në 50 vjeç është rritur me 24% që nga viti 1990, një rritje më e madhe se në çdo grupmoshë tjetër. Provat tregojnë se kjo rritje është e lidhur me bakteret e dëmshme në zorrë dhe inflamacionin kronik të shkaktuar nga dieta e dobët dhe ushqimet e përpunuara.
Studimet e Cancer Research UK, të prezantuara në takimin e Shoqatës Amerikane të Onkologjisë Klinike (ASCO) në Çikago, tregojnë se pacientët në fazën fillestare të kancerit të zorrës së trashë kanë më shumë baktere të dëmshme në zorrë, të cilat lidhen me inflamacionin kronik dhe mutacionet në ADN. Këto baktere mund të shkaktojnë formimin e tumoreve. Një tjetër studim nga Universiteti Shtetëror i Ohajos zbuloi se njerëzit nën moshën 50 vjeç me kancer të zorrës së trashë kishin qeliza që dukeshin 15 vjet më të vjetra se mosha e tyre, për shkak të dëmtimit nga inflamacioni afatgjatë.
Ndryshimet në dietë gjatë 30-40 viteve të fundit, përfshirë përdorimin e ëmbëlsuesve në ushqimet e përpunuara, janë faktorë kryesorë të rrezikut. Ndërsa nuk ka një qasje të vetme për shëndetin, këto zbulime nënvizojnë rëndësinë e një diete të shëndetshme dhe të ekuilibruar për parandalimin e kancerit.
©️zërionline
*Ripublikimi i materialeve tona lejohet vetëm nëse bëhet citimi i autorit, burimit origjinal.
