Procesi i Maturës Shtetërore 2025 ka nisur sot edhe në Durrës me provimin e parë, atë të gjuhës së huaj. Në të gjithë territorin e bashkisë Durrës marrin pjesë 2,450 maturantë, të shpërndarë në 11 qendra provimi, të organizuara nga Zyra Vendore Arsimore.
Drejtoresha e ZVA Durrës, Amarilda Thërrmija, deklaroi se janë marrë të gjitha masat për zhvillimin e provimeve në kushte të sigurta dhe në përputhje me të gjitha standardet e përcaktuara nga Ministria e Arsimit.
“Ambientet janë përgatitur duke respektuar distancën mes bankave, janë kryer pastrime dhe dezinfektime të detajuara dhe është siguruar ajrosja e vazhdueshme e klasave për të garantuar komoditetin dhe sigurinë e nxënësve gjatë provimeve”, tha Thërrmija.
Për mbarëvajtjen e këtij procesi janë angazhuar rreth 500 punonjës të sistemit arsimor, përfshirë drejtues shkollash, nëndrejtorë, mësues, psikologë, punonjës socialë dhe oficerë sigurie.
ZVA Durrës ka kryer një inspektim të plotë paraprak të çdo qendre provimi, për të garantuar respektimin e të gjitha rregullave dhe kushteve që lidhen me vlerësimin e nxënësve dhe integritetin e procesit.
Matura Shtetërore mbetet një moment kyç për të ardhmen e të rinjve, teksa nisja me provimin e gjuhës së huaj shënon hapin e parë në këtë rrugëtim të rëndësishëm.
Suksese të gjithë maturantëve!
©️zërionline
