Në orët e para të mëngjesit, dy skuadra të Byrosë Kombëtare të Hetimit (BKH), të mbështetura nga patrulla të Policisë së Shtetit, kryen një operacion të koordinuar në Durrës dhe Tiranë, bazuar në një urdhër të Gjykatës së Posaçme Kundër Korrupsionit dhe Krimit të Organizuar (GJKKO).
Hetuesit e BKH-së, nën drejtimin e prokurorëve të SPAK-ut, ushtruan kontrolle në katër adresa të lidhura me biznesmenin Ergys Agasi, dy banesa private, një në Durrës dhe një në Tiranë, si dhe dy ambiente biznesi në pronësi të tij.
Burime jozyrtare thonë se verifikimet lidhen me një hetim të mundshëm për kontrabandë cigaresh, marrëdhënie me klanin “Troplini” ose korrupsion zgjedhor. Për shkak të sekretit hetimor, SPAK nuk ka bërë ende të ditur hollësi të tjera.
Po sipas të njëjtave burime, janë lëshuar disa urdhër‑arresti në kuadër të procedimit penal. Ende nuk ka konfirmim nëse Agasi ose të afërm të tij ndodhen mes personave të ndaluar.
Operacioni vijon, ndërsa priten deklarata zyrtare nga SPAK apo Policia e Shtetit gjatë orëve në vijim.
©️zërionline
