Policia Bashkiake dhe Inspektorati i Mbrojtjes së Territorit (IMT) në Durrës kanë nisur një aksion për lirimin e hapësirave publike të zëna nga subjektet private. Ndërhyrja po zhvillohet në bulevardin “Epidamn”, zonën pranë “Velierës” dhe në hyrje të qytetit, ku janë konstatuar prej kohësh zaptime të trotuareve dhe hapësirave publike nga lokalet.
Aksioni ka nisur mbrëmjen e djeshme dhe ka vijuar edhe sot, ndërsa në disa raste vetë subjektet kanë filluar të heqin tavolinat dhe pajisjet që kishin vendosur në hapësirat publike, duke liruar rrugën për këmbësorët dhe duke shmangur penalitetet.
Ndërhyrja vjen pas paralajmërimeve të përsëritura të Kryeministrit Edi Rama, i cili pritet të vizitojë Durrësin pasditen e sotme. Në fokus të vizitës janë pikërisht hapësirat publike të zëna në mënyrë të paligjshme, të cilat kreu i qeverisë i ka cilësuar si “tokë e xanun”.
Megjithatë, zaptimi i trotuareve dhe shesheve publike nga biznese private është një problem i kahershëm në Durrës. Edhe pse ka pasur aksione të mëparshme për lirimin e këtyre hapësirave, ndërhyrjet nuk kanë rezultuar afatgjata. Mungesa e kontrollit të vazhdueshëm ka bërë që zënia e trotuareve të kthehet në një fenomen të zakonshëm, jo vetëm në qendër, por edhe në lagjet e tjera të qytetit bregdetar.
©️zërionline
