Gjykata e Posaçme kundër Korrupsionit dhe Krimit të Organizuar ka shpallur këtë të hënë vendimin për ish-shefin e Seksionit të Antidrogës në Drejtorinë Vendore të Policisë Durrës, Gazmir Preçi, duke e dënuar përfundimisht me 2 vite e 4 muaj burgim dhe pezullimin nga funksionet publike për një periudhë 5-vjeçare.
Në fillim, Preçi u dënua me 3 vite e 6 muaj burg, por përfitoi ulje dënimi në masën 1/3 për shkak të gjykimit të shkurtuar, duke e çuar kështu dënimin përfundimtar në 2 vite e 4 muaj.
Sipas njoftimit zyrtar të Gjykatës së Posaçme (GJKKO), trupi gjykues i përbërë nga gjyqtaret Etleva Deda, Irena Gjoka dhe Flojera Davidhi, në vendimin e sotëm, më 14 korrik vendosi:
“Deklarimin fajtor të të pandehurit Gazmir Preçi, për kryerjen e veprës penale ‘Korrupsioni pasiv i personave që ushtrojnë funksione publike’, parashikuar nga neni 259/2 i Kodit Penal, dhe dënimin e tij me 3 vite e 6 muaj burg. Në aplikim të nenit 406 të Kodit të Procedurës Penale, uljen e këtij dënimi me 1/3, duke e dënuar përfundimisht me 2 vite e 4 muaj burgim.”
Po ashtu, GJKKO vendosi që vuajtja e dënimit për Preçin do të llogaritet nga dita e arrestimit dhe ai do ta kryejë atë në një nga institucionet për të dënuarit e rritur me regjim të zakonshëm sigurie.
Akuzat ndaj Preçit
Gazmir Preçi u arrestua në gusht të vitit 2024, pasi i mori 10 mijë euro një pronari lokali nate në Durrës, duke ushtruar presion se do t’i mbyllte biznesin nëse nuk i jepej shuma e kërkuar.
Rasti u hetua nga SPAK si pjesë e përpjekjeve për të goditur korrupsionin në radhët e zyrtarëve të policisë dhe strukturave të tjera shtetërore.
©️zërionline
