Një robot i krijuar në Brazil po ndryshon mënyrën sesi do të kryhet ripyllëzimi. Forest.Bot është i aftë të mbjellë mbi 14,000 pemë në ditë, me një saktësi të lartë dhe kujdes individual për çdo fidan.
Ndryshe nga teknologjitë e zakonshme që përdorin dronë për të shpërndarë fara në mënyrë masive, startup-i brazilian ka zgjedhur një qasje më të përqendruar, një robot elektrik që mbjell fidanë të rritur tashmë, duke garantuar një shkallë shumë më të lartë mbijetese për bimësinë.
Çdo fidan që mbillet nga Forest.Bot regjistrohet me koordinata GPS dhe me informacionin përkatës mbi specien, duke mundësuar një monitorim të plotë dhe të vazhdueshëm. Roboti mund të mbjellë deri në 1,800 fidanë në orë dhe në një ditë të plotë pune, kapaciteti i tij shkon deri në 86,000 pemë.
Por Forest.Bot nuk ndalet me mbjelljen. Ai kthehet në terren për të kontrolluar gjendjen e bimëve, i rehidraton ato dhe ndërhyn në rast se has probleme si insekte apo kushte klimatike kritike. Kjo e bën atë një mjet të fuqishëm në procesin e kujdesit afatgjatë për pyjet e reja.
Teknologjia kombinon forcat, dronët mbulojnë sipërfaqe të mëdha dhe të vështira, ndërsa robotët si Forest.Bot ofrojnë precizion dhe kontroll aty ku kërkohet ndërhyrje më e sofistikuar. Kjo qasje e dyfishtë mund të sjellë një ndikim real dhe të qëndrueshëm në përpjekjet për ripyllëzim.
Brazili ka vendosur një objektiv ambicioz, të restaurojë 12 milionë hektarë pyje deri në vitin 2030. Iniciativa si Forest.Bot janë një ndihmë konkrete në këtë drejtim, të zhvilluara dhe prodhuara plotësisht në vend, ato përfaqësojnë një shembull të teknologjisë në shërbim të natyrës.
A na duhet vallë dhe ne një Forest.Bot të shpëtojmë mjedisin dhe pasojat e betonizimit masiv?!
©️zërionline
