Mbledhja e fundit e Këshillit Bashkiak të Durrësit nisi me disa minuta vonesë dhe u shoqërua menjëherë me një reagim nga këshilltari demokrat Dritan Burgija, në cilësinë e kreut të grupit të këshilltarëve të opozitës. Për shkak të mosrespektimit procedural, rregullores së këshillit, ai deklaroi largimin e këshilltarëve të opozitës nga salla e Këshillit Bashkiak. Pas largimit të tyre, në sallë mbetën të pranishëm vetëm 23 këshilltarë, duke bërë që të mos arrihej kuorumi i nevojshëm prej të paktën 26 anëtarësh për të vijuar me vendimmarrjet e planifikuara.
Shkak për këtë përplasje u bë përfshirja në mënyrë të menjëhershme, pak minuta përpara nisjes së mbledhjes, e dy pikave shtesë në rendin e ditës. Bëhej fjalë për dy raste që lidhen me përfitimin nga programi i rindërtimit për familje të prekura nga tërmeti në zonat e Ishmit dhe Manzës.
Sipas këshilltarëve të opozitës, përfshirja e këtyre dy pikave pa një njoftim dhe mbledhje paraprake të komisionit përkatës shkel procedurat standarde dhe nuk garanton transparencë. Pa kërkuar shtyrjen e shqyrtimit të tyre, ata vendosën të largohen nga mbledhja në shenjë proteste.
Për pasojë, mungesa e kuorumit bllokoi zhvillimin e mbledhjes e cila u mbyll pa filluar. Nuk është hera e parë që mbledhjet e Këshillit Bashkiak në Durrës shoqërohen me debate dhe përplasje politike mes mazhorancës dhe opozitës lokale.
©️zërionline
