Që në orët e para të mëngjesit të sotëm, trupa të Forcave të Armatosura i janë bashkuar operacionit për shuarjen e zjarrit që vijon të përhapet në territorin e Belishovës, një nga zonat më të goditura nga flakët në qarkun e Fierit.
Zjarri, i cili ka hyrë sot në ditën e gjashtë, ka përfshirë një sipërfaqe të konsiderueshme toke, duke filluar në masivin pyjor të Drenovës dhe duke vijuar në kodrat e Gorishovës, ku janë djegur dhjetëra rrënjë ullinj. Aktualisht, vatra kryesore ndodhet në Belishovë, ku mbrëmjen e kaluar flakët rrezikuan edhe banesa të izoluara pranë pyllit.
Në terren po punojnë shërbimet zjarrfikëse, efektivët e emergjencës civile, policia bashkiake dhe tani edhe forcat ushtarake, por zjarri ende nuk është neutralizuar.
Sipas burimeve nga emergjencat civile, ndërhyrja nga ajri do të bëhet vetëm nëse vatrat rrezikojnë të përhapen më tej, apo të afrohen drejt zonave të banuara.
Përparësi mbetet kontrolli dhe izolimi i vatrave aktive, ndërkohë që dëmet e shkaktuara deri tani janë të konsiderueshme.
©️zërionline
