Një rast kontrabande është goditur nga Policia Kufitare në Portin e Durrësit. Në kuadër të operacionit policor të koduar “Qelqi”, është arrestuar në flagrancë një 42-vjeçar që tentoi të fuste në territorin shqiptar, pa i deklaruar në doganë, sasi të konsiderueshme verë dhe shampanjë.
Shërbimet e Policisë Kufitare, në vijim të kontrolleve intensive në hyrje/dalje të vendit dhe bazuar në analizën e riskut për paligjshmëritë në kufi, kanë ushtruar kontroll në një kamion që po hynte në Shqipëri, i drejtuar nga shtetasi Sh. G., banues në Durrës.
Gjatë kontrollit, në mjet u gjetën arka të mbushura me verë dhe shampanjë, për të cilat drejtuesi i automjetit nuk posedonte fatura blerjeje apo dokumente të tjera shoqëruese. Dyshohet se mallrat ishin të destinuara për tregun vendas dhe synoheshin të futeshin në mënyrë të paligjshme, pa u deklaruar në Pikën e Kalimit Kufitar, siç parashikon ligji.
Në përfundim të veprimeve procedurale, Policia arrestoi në flagrancë 42-vjeçarin Sh. G., ndërsa u sekuestruan kamioni, mallrat e kontrabanduara, pasaporta dhe telefoni celular i të arrestuarit, si prova materiale.
©️zërionline
