Arrestohet administratori i një klinike dentare dhe një stomatolog, ndërkohë ka nisur procedimi penal për 12 punonjësit e klinikës. Shkaku është përdorimi i preparateve të skaduara. Mësohet se të arrestuarit janë Kejdi Myzyri (stomatolog) dhe Ervin Zeka, administratori i klinikës.
Arrestimet janë bërë në kuadrin e operacionit të koduar “Siguria Dentare”, i zhvilluar nga Sektori për Hetimin e Krimit Ekonomik dhe Financiar i DPPSh-së, në bashkëpunim me Forcën e Posaçme “Shqiponja” të DVP Tiranë.
Policia njoftoi se ka sekuestruar preparate dhe materiale që përdoreshin për këto shërbime, që ishin të skaduara.
Në njoftimin zyrtar thuhet se në Rrugën e Kavajës, në ambientet e subjektit me administrator shtetasin E. Z., që ofronte shërbime dhe punime stomatologjike dhe laboratorike si: terapi, ortodoncë, kirurgji, ura porcelani, proteza, implante dhe riparime të aparaturave dentare, shërbimet e Policisë gjetën dhe sekuestruan me cilësinë e provës materiale, një sërë preparatesh dhe materialesh dentare të skaduara.
Në përfundim të veprimeve procedurale për këtë rast, u arrestuan në flagrancë administratori i subjektit, shtetasi E. Z., 40 vjeç, dhe shtetasi K. M., 26 vjeç, të dy stomatologë në klinikë.
Gjithashtu, u referuan materialet në Prokurori, ku nisi procedimi në gjendje të lirë për 12 punonjës në këtë klinikë.
©️zërionline
