Në një atmosferë të ngrohtë dhe miqësore, shtetas italianë që jetojnë dhe punojnë prej vitesh në Durrës u mblodhën me familjet dhe miqtë e tyre shqiptarë për të shijuar buzë detit ethet e ndeshjes së shumëpritur dhe mjaft emocionuese të këtij Europiani, që vuri përballë në futboll dy vendet tona. E vështirë t’i dallosh shumë prej tyre, pasi mbajnë veshur fanellat kuqezi dhe ndjekin plot emocion çdo aksion të kombëtares sonë.
“Sonte është me të vërtetë shumë e vështirë, ishalla fiton Shqipëria. Jemi italianë dhe e kemi zemrën në Shqipëri. Nuk po e tradhëtoj Italinë, jo, por dhe Shqipëria e meriton të fitojë. Jemi rreth 30 veta që u mblodhëm këtu. Më shumë italianë… Cili ishte goli më i bukur? U gëzova për golin e minutës së parë më shumë,” shprehet Pina, e martuar vite më parë me një emigrant nga Durrësi në Itali, por që prej vitesh ata kanë zgjedhur Durrësin familjarisht për të jetuar e çuar përpara bizneset e tyre.
Me fanellën e kombëtares sonë të veshur, një tjetër italian, Roberto shprehet:
“Kam veshur fanellën kuqezi sepse është e vendit që na mikpriti dhe që na trajton mirë, ndaj për ne: Forca Shqipëri! Ndjehem në shtëpi këtu, ndaj bëj tifo për të. Kisha parashikuar 2-1 për Shqipërinë, por gabova.”
Edhe pse Italia triumfoi në fushën e lojës, të gjithë e shijuan ndeshjen dhe të qenit bashkë në sport dhe në jetën e përditshme. Italianët që jetojnë në Durrës e shfrytëzuan këtë mundësi për të shprehur mirënjohjen e tyre për mikpritjen e ngrohtë që kanë gjetur në Shqipëri, duke krijuar kështu një lidhje të veçantë, përtej sfidës sportive.
“E adhuroj Shqipërinë. Zemra ime. Jam e lumtur të bëj tifo për Shqipërinë. Ishte e vështirë kjo ndeshje, sepse 50% zemra Shqipëria, 50 % zemra Italia. Do të isha shumë e kënaqur edhe po të fitonte Shqipëria.”, shprehet një italiane që gjithashtu mban veshur bluzën kuqezi.
Një tjetër çift që mban veshur bluzat me shqiponjë shprehen:
“Sonte ndihemi shqiptarë dhe kemi vendosur të bëjmë tifo për të. Jemi në një shoqëri të bukur. Mbrëmje e bukur me njerëz të mrekullueshëm.”
“Unë jam nga Letonia dhe në këtë Europian bëj tifo për Shqipërinë.”
Mbrëmja e kaluar do të mbahet mend jo vetëm për rezultatin, por mbi të gjitha për ndjenjat e solidaritetit dhe miqësisë të forcuara përgjatë historisë së një fqinjësie të mirë mes dy popujve tanë.
@zërionline
*Ripublikimi i materialeve tona lejohet vetëm nëse bëhet citimi i autorit, burimit origjinal.
