Në përfundim të numërimit të votave dy kandidatët kryesorë në garën për rektor të UAMD-së kanë reaguar në rrjetet sociale duke falenderuar mbështetësit e tyre, por dhe…
Pas fitores, Prof. Dr. Shkëlqim Fortuzi falenderoi dhe premtoi zbatimin e gjithçkaje që prezantoi në Fushatë:
“SOT FITOI UAMD
Të nderuar kolegë pedagogë dhe studentë,
Ju falenderoj thellësisht nga zemra për votën Tuaj dhe besimin që më dhatë të jem Rektori i Universitetit “A. Moisiu” Durrës, 2024-2028.
Sot nuk është dita e fitores sime, por e fitores sonë.
Është privilegj i jashtëzakonshëm t’Ju shërbej duke punuar SË BASHKU për një universitet me standarde evropiane.
Siç kam premtuar gjatë të gjithë kësaj periudhe zgjedhore unë do i përmbahem çdo pike të Platformës 2024-2028 të cilën e hartuam SË BASHKU dhe do e përmbushim SË BASHKU.
UNË E MBAJ FJALËN 🤝
Me mirënjohje të thellë
Përulësisht,
Prof. Dr. Shkëlqim Fortuzi”
Mesazhi i kandidatit për rektor Prof. Dr. Osman Metalla për ata që e votuan dhe ata që e hodhën votën gjetkë:
“Të dashur kolegë e studentë!
Në mbyllje të këtij procesi zgjedhor dua të falenderoj secilin nga Ju që më ka mbështetur përmes pjesëmarrjes në takimet në departamente, grupe e individuale. Dua të shpreh mirënjohjen për çdo mesazh të dërguar në telefon e mediat sociale. Për 30 ditë ne komunikuam me deshirën që përmes mendimeve dhe votes tuaj të punonim për një projeksion modern të Universitetit tonë. Aritmetika e numrave dhe sinergjia e shpirtrave shpesh nuk shkojnë në të njëjtin drejtim. Faleminderit të gjithë atyre që më votuan. Kolegët që menduan ndryshe uroj të kenë peshuar vendimin e tyre.
Duke ju uruar më të mirën,
O. M. 21.06.2024″
@zërionline
