Me duartrokitje dhe karafila të bardhë mbi arkëmort të hedhura nga të gjithë të pranishmit, është përcjellë për në banesën e fundit kolosi i letrave shqipe, Ismail Kadare.
Pas homazheve të mbajtura në Teatrin e Operas dhe Baletit, ku morën pjesë familjarë, miq, dashamirës e figura të larta shtetërore të vendit, Kosovës dhe Maqedonisë së Veriut, të botës së artit e letërsisë, si dhe qytetarë Kadare është përcjellë nga kortezhi për në varrezat e Tufinës.
Ishte kërkesa e bashkëshortes së tij, Helenës, për t’u varrosur vetëm në prani të familjarëve, duke mbyllur kështu homazhet në momentin e nisjes së kortezhit.
Ismail Kadare mbetet një ndër shkrimtarët më të mirë të letërsisë botërore bashkëkohore dhe autori më i përkthyer shqiptar jashtë vendit. Ai ishte gjithashtu fitues i disa çmimeve letrare ndërkombëtare, si dhe i nominuar disa herë për çmimin Nobel.
Pavarësisht ikjes fizike, ai mbetet i gjallë me veprën e tij, jehonën e saj në botë, si dhe me kundërshtitë, debatet që shkaktoi dhe me largimin e tij nga kjo botë, ashtu si vetëm njerëzit e mëdhenj bëjnë.
@zërionline
