Muzeu Etnografik i Durrësit, që njihet edhe si banesa karakteristike durrsake ku aktori i famshëm Aleksandër Moisiu kaloi disa vite të fëmijërisë së tij, është futur më në fund në proces restaurimi. Vendimi në KKTKM u mor në tetor të vitit të kaluar, pas dëmeve të mëdha që pësoi ndërtesa dykatëshe me çardak gjatë tërmetit shkatërrimtar të 26 nëntorit 2019.
Banesa e ndërtuar në qendrën historike të qytetit u dëmtua rëndë gjatë tërmetit, ndërsa qëndronte e mbyllur dhe për shkak të problemeve me pronësinë e saj. Situatë që detyroi autoritetet të mbyllin dyert për vizitorët dhe turistët. Restaurimi i ndërtesës, që daton nga gjysma e dytë e shekullit XIX, po realizohet me fondet e BE-së, në kuadër të programit EU4Culture dhe zbatohet nga UNOPS. Investimi kap vlerën mbi 45 milionë lekë dhe pritet të përfundojë brenda shtatë muajve.
Edhe Myzeu Arkeologjik në Durrës është i mbyllur pasi po i nënshtrohet restaurimit.
Tërmeti i vitit 2019 shkaktoi dëme të mëdha jo vetëm në mijëra banesa individuale dhe kolektive, por edhe në mjaft institucione publike arsimore dhe shëndetësore, si dhe godina të trashëgimisë kulturore të qytetit bregdetar.
@zërionline
