Alarmi ndaj një produkti të rrezikshëm ushqimor për fëmijët në treg ka nxitur reagimin e Autoritetit Kombëtar të Ushqimit. AKU ka sqaruar opinionin publik në lidhje me deklaratën e pavërtetë dhe të pabazuar mbi mosbllokimin e një produkti lëpirëse për fëmijë, të supozuar se përmban gozhdë.
Në njoftimin e AKU-së, theksohet se informacioni mbi këtë produkt ka ardhur nga sistemi RASFF më datë 18 janar 2024, ku Shqipëria është përfshirë për ndjekje.
Pas marrjes së këtij njoftimi, AKU ka ndërmarrë menjëherë hapat për verifikimin e rastit në terren dhe kontrollin e dokumentacionit të importit nga Pikat e Inspektimit Kufitar (PIK).
Gjatë shqyrtimit të të dhënave nga PIK, është konfirmuar se produkti “Johny Bee Strawberry Pop Lizak z mini drażetkami o smaku truskawkowym” (lëpirëse me luleshtrydhe) me numër LOT KD4354 dhe datë skadence 29 prill 2026 nuk është importuar në Republikën e Shqipërisë dhe, për pasojë, nuk është shpërndarë në tregjet e vendit.
AKU rikonfirmon, sipas deklaratës, përkushtimin e tij në garantimin e sigurisë ushqimore dhe mbrojtjen e shëndetit të konsumatorit, duke qëndruar në gatishmëri të plotë për kryerjen e misionit të tij.
@zërionline
