Ankesat nuk e ndryshojnë fituesin e tenderit
Autoriteti Rrugor Shqiptar ka rishpallur kompaninë fituese që do të kryejë rikonstruksionin e rrugës së vjetër Kombinat – Ndroq – Plepa Loti 1. Me një ofertë prej 567.75 milion lekë, pa TVSH, punimet në lotin 1 të rrugës do të kryhen nga bashkimi i operatorëve “Arifaj” dhe “Eurokos Holding sh.p.k, dega në Shqipëri”. Tenderi, me fond limit prej afro 755 milion lekë pa TVSH u hap në prill dhe u zhvillua në maj të këtij viti. Në tender morën pjesë 21 kompani, shumica e të cilave u skualifikuan. Fitues u shpall bashkimi i dy operatorëve për realizimin e këtij investimi të rëndësishëm në infrastrukturën rrugore me fonde të buxhetit të shtetit. Por pas shpalljes së fituesit, 2 operatorë ekonomikë pjesëmarrës në garë, “Pe-Vla-Ku” dhe një tjetër bashkim operatorësh “Ulza shpk & Pepa Group shpk & Almo Konstruksion shpk” depozituan ankesë pranë Komisionit të Prokurimit Publik, duke shfaqur kundërshtime për vendimin e Komisionit të Vlerësimit të Ofertave për skualifikimin e tyre. Pas shqyrtimit të ankesave, KPP i pranoi pjesërisht ato dhe kërkoi rivlerësimin e procedurës, po kjo nuk solli ndryshime në emrin e fituesit të këtij tenderi të hapur për punë publike.
Rikonstruksioni i rrugës së vjetër Kombinat – Ndroq – Plepa do të kryhet paralelisht me zgjerimin e autostradës Tiranë – Durrës. Edhe për autostradën janë shpallur kompanitë fituese të tenderit, ndërsa zgjerimi i saj të parë do të kushtojë rreth 3.33 miliard lekë, pa TVSH, faza 1 & 2.
Rruga e vjetër do të shërbejë si rrugë alternativë për të lidhur Durrësin me Tiranën dhe anasjelltas, ndërsa pas investimit, autostrada që lidh dy qytetet e metropolit shqiptar është paralajmëruar se do të përdoret nga përdoruesit e rrugës kundrejt pagesës.
Përdoruesit e aksit rrugor Kombinat- Ndroq-Plepa, që lidh Tiranën me Durrësin, shpresojnë që punimet, në këtë aks të amortizuar dhe të lënë prej shumë vitesh në harresë, të jenë cilësore. Dëmtimi i madh i rrugës dhe gropat e krijuara ndër vite në shumë pjesë e kishin bërë thuajse të pakalueshëm këtë aks, dikur kombëtar pasi lidhte Tiranën me Durrësin dhe jugun e juglindjen e vendit.
Aktualisht, përgjatë kësaj rruge janë zhvilluar dhe mjaft zona agroturistike, duke e bërë mirëmbajtjen e saj të domosdoshme. Janë dhjetra biznese që zhvillojnë aktivitete bujqësore dhe kanë ferma, si dhe mijëra banorë të fshatrave përgjatë kësaj rruge që e lidhin jetën dhe aktivitetin e tyre të përditshëm me të.
©️zërionline
