Këtë të enjte, më 10 tetor, u mbajt ceremonia e shumëpritur e inaugurimit të Xhamisë së Namazgjasë, një objekt kulti me rëndësi të madhe për komunitetin mysliman në Shqipëri. Ky moment shënoi përmbushjen e një ëndrre të vjetër të shqiptarëve, e realizuar falë bashkëpunimit mes Shqipërisë dhe Turqisë.
Xhamia e Namazgjasë, e ndërtuar me mbështetjen bujare të popullit turk dhe përkushtimin e Presidentit të Turqisë, Recep Tayyip Erdoğan, si dhe ndihmën e Qeverisë Shqiptare, u inaugurua në prani të liderëve të dy vendeve. Presidenti Erdoğan dhe Kryeministri Edi Rama morën pjesë në ceremoninë e përurimit, ku u bashkuan me Myftiun e Tiranës, Gazment Teqja, i cili do të drejtojë bordin e administrimit të xhamisë.
Ky projekt i përbashkët midis Komunitetit Mysliman të Shqipërisë dhe autoriteteve turke, u bë i mundur edhe falë kontributit të rëndësishëm të qeverisë shqiptare, e cila zgjidhi çështjet pronësore për truallin ku është ndërtuar xhamia.
Xhamia e Namazgjasë nuk do të shërbejë vetëm si vendfalje për besimtarët, por do të funksionojë edhe si një kompleks multifunksional, i hapur për qytetarët dhe turistët, duke ofruar shërbime dhe hapësira të ndryshme për komunitetin.
“Falënderojmë popullin dhe presidentin Erdoğan, si dhe kryeministrin Rama, për realizimin e kësaj ëndrre. Një falënderim i veçantë shkon për të gjithë ata që kontribuan në ndërtimin e kësaj vepre madhështore,” u shprehën përfaqësuesit e Komunitetit Mysliman.
Ceremonia e inaugurimit tërhoqi vëmendjen e besimtarëve dhe qytetarëve, duke përfshirë Xhaminë e Namazgjasë në hartën e monumenteve të rëndësishme kulturore dhe fetare jo vetëm të kryeqytetit, po të gjithë rajonit.
* * *
Xhamia e Namazgjasë nuk do të jetë nën juridiksionin e plotë të Komunitetit Mysliman Shqiptar (KMSH), por do të drejtohet nga një Bord drejtues. Ky është një kompromis i arritur mes kryeministrit Edi Rama dhe presidentit turk Recep Tayyip Erdogan, për të shmangur kontrollin e të ashtuquajturve “gylenistë” mbi këtë xhami të madhe, e cila është ndërtuar me fonde të qeverisë turke.
Presidenti Erdogan ka akuzuar disa herë KMSH-në për ndikim të anëtarëve të organizatës “FETO,” të cilën ai e konsideron përgjegjëse për tentativën e grushtit të shtetit në Turqi. Ai i ka bërë thirrje kryeministrit Rama të largojë individët që ai i konsideron të lidhur me këtë organizatë nga drejtimi i KMSH-së, megjithëse deri tani nuk është ndërmarrë asnjë hap konkret nga pala shqiptare dhe pasi shteti është laik dhe nuk ka fuqi vendimmarrëse mbi komunitetet fetare dhe drejtuesve të tyre.
Xhamia e Namazgjasë pritej të inaugurohej disa vite më parë, por përplasjet brenda Komunitetit Mysliman Shqiptar detyruan edhe presidentin Erdogan të shtynte ceremoninë e inaugurimit të këtij investimi të madh nga qeveria turke.
©️zërionline
