Një aksion i madh policor, i koduar “Anti-botoks,” ka vënë në pranga tre persona dhe ka shpallur në kërkim tre të tjerë, përfshirë edhe kreun e klinikës estetike KEIT, Skerdi Faria. Operacioni është përqendruar në klinika estetike ku kryheshin procedura me produkte të paligjshme, të kontrabanduara në vend, përfshirë injeksione botoksi.
Në këtë operacion, policia ka arrestuar Mildon Kumarakun, administrator i një kompanie që dyshohet se kontrabandonte dhe magazinonte produktet e paligjshme, të cilat më pas shpërndaheshin në klinika estetike. Gjithashtu, në pranga kanë përfunduar dhe dy administratore të klinikave, Xhuljana Mahmuti dhe Deisa Shehaj.
Ndërsa për të kapur Skerdi Farian dhe dy të tjerë të shpallur në kërkim, forcat e rendit janë ende duke zhvilluar kontrolle dhe hetime. Sipas Policisë, procedimi në gjendje të lirë është iniciuar edhe për disa të tjerë të përfshirë në këtë rrjet të gjerë, ndërsa pamjet e produkteve të sekuestruara tregojnë sasi të konsiderueshme të materialeve të përdorura.
Historia e Skerdi Farisë, personazh i njohur dhe përmes ekranit, është një ndër ato që ndjek një rrugëtim të suksesshëm, por që ka marrë një kthesë të papritur me këtë zhvillim të fundit. Dikur student që shiste vaj makinash në rrugën Tiranë-Durrës për të mbijetuar, ai arriti të sigurojë një bursë në Itali, prej nga ku u kthye me një plan ambicioz biznesi. Sot, ai është një nga emrat më të njohur në industrinë e estetikës në Shqipëri, por përfshirja e tij në këtë hetim vë në pikëpyetje suksesin e ndërtuar gjatë viteve.
Operacioni vazhdon dhe policia ka paralajmëruar për masa të mëtejshme për të zbardhur plotësisht rrjetin e përfshirë në këtë aktivitet të paligjshëm.
©️zërionline
