Gërmimet e fundit arkeologjike në Amfiteatrin Antik të Durrësit kanë nxjerrë në dritë katër varre foshnjash, të cilat besohet se i përkasin periudhës mes shekujve IX-XI. Ekspedita italo-shqiptare është përqendruar në galeritë 8 dhe 9, duke eksploruar shtresat arkeologjike të periudhës osmane dhe Mesjetës së hershme, gjë që i shton një dimension të ri historik këtij vendbanimi të lashtë.
Arkeologia Elvana Metalla tha se projekti është financuar nga Instituti Arkeologjik, Universiteti i Kietit dhe Ministria e Jashtme Italiane, duke përfshirë një bashkëpunim të hershëm ndërmjet ekspertëve shqiptarë dhe italianë.
Sipas Metallës, gjatë Mesjetës, Amfiteatri është përdorur e ripërdorur si hapësirë banimi, po dhe për qëllime artizanale.
“Pas heqjes së shtresave të periudhës osmane dhe asaj mesjetare, arritëm të zbulojmë nivelin e përdorimit të këtij vendi si varrezë. Katër varret e zbuluara i përkasin foshnjave nga 0 deri në 1 vjeç dhe kanë një rëndësi të veçantë për të kuptuar se kjo zonë shërbente si varrezë në shekujt VI-VII dhe u ripërdor në shekujt IX-XI,” tha ajo.
Zbulime të tjera të rëndësishme
Një furrë qeramike e zbuluar më herët është përcaktuar se daton në shekullin XII, ndërsa materialet e gjetura përfshijnë qeramikë të periudhës mesjetare, kryesisht prodhim vendas dhe disa të importuara nga Bizanti dhe vendet islamike. Ndër të tjera janë zbuluar dhe materiale qelqi dhe monedha të periudhave të ndryshme.
Arkeologia Metalla shtoi se gjatë gërmimeve është zbuluar edhe një pus, me një thellësi prej 1.5 metrash, që ka nxjerrë materiale të Mesjetës së vonë. “Materialet e gjetura do të analizohen nga antropologu Ulsi Tota, për të përcaktuar një datim më të saktë,” sqaroi ajo.
Këto zbulime ndihmojnë në rindërtimin e historisë së një vendbanimi portual të rëndësishëm, i cili ka luajtur një rol kyç në marrëdhëniet tregtare ndër shekuj, duke dëshmuar për trashëgiminë e pasur historike të qytetit të Durrësit.
©️zërionline
