Sektori i pasurive të paluajtshme në Shqipëri ndodhet në një ngërç të thellë, për shkak të mungesës së qartësisë dhe zvarritjes së trajtimit të iniciativës për Rivlerësimin e Pasurive të Paluajtshme. Kjo nismë, e propozuar nga deputetja Blerina Gjylameti dhe e miratuar nga kryeministri në korrik me normën 5%, kishte për qëllim të hynte në fuqi në shtator të vitit 2024. Sipas NAREA, Shoqata Kombëtare e Ndërmjetësve të Pasurive të Paluajtshme”, mosdepozitimi i qëndrimit institucional dhe oponencës nga Ministria e Financave ka shkaktuar paqartësi dhe pezullim të procedurave parlamentare, duke e lënë sektorin në pritje për pothuajse gjashtë muaj.
Kjo vonesë ka ndikuar direkt në funksionimin e sektorit imobiliar, duke rritur ndjeshëm rrezikun e një kolapsi të mundshëm. Pa një kornizë të qartë ligjore, operatorët në këtë industri e kanë të pamundur të kryejnë transaksionet e pasurive të paluajtshme dhe të ofrojnë shërbime të qëndrueshme për klientët e tyre. Dyshimet për një fushatë të mundshme rivlerësimi gjatë vitit zgjedhor kanë shtuar pasigurinë, duke krijuar efekte zinxhir në të gjithë sektorin ekonomik dhe financiar të vendit.
Ndikimet janë të shumta dhe përfshijnë jo vetëm vështirësitë ekonomike, por edhe rrezikun e një strehimi të papërballueshëm për qytetarët, ndërsa sistemit financiar i kanoset një destabilizim i mundshëm. Mungesa e veprimeve konkrete për zgjidhjen e këtij ngërçi ka lënë sektorin e pasurive të paluajtshme në një situatë kritike, duke kërcënuar stabilitetin dhe qëndrueshmërinë e tij për të ardhmen.
©️zërionline
