Një operacion i fundit i policisë ka çuar në arrestimin e një 34-vjeçari nga Tirana, i cili u kap me 88,000 euro të fshehura në trup dhe në çantë, të dyshuara se vijnë nga veprimtari kriminale. Elton Balliu u ndalua në hyrje të Shqipërisë, në portin e Durrësit, si rezultat i kontrolleve të imtësishme të kryera nga Seksioni i Hetimit dhe ZMPKT Durrës, në bashkëpunim me Stacionin e Policisë Kufitare të portit.
Bazuar në informacionet e siguruara nga inteligjenca policore, kamioni që drejtonte Balliu u kalua për kontroll më të detajuar, ku u përdorën metoda bashkëkohore për të siguruar qarkullimin e ligjshëm të mallrave dhe shtetasve. Gjatë këtij kontrolli, policia zbuloi 88,000 euro të ndara në katër pako dhe të mbështjella me natriban, me qëllim për të shmangur deklarimin. Gjithashtu, në kamion u gjetën 18 shishe me verë, të cilat dyshohen të kontrabanduara, pasi nuk ishin të shoqëruara me faturë blerjeje.
Autoritetet sekuestruan paratë dhe mallin e kontrabanduar, ndërsa materialet procedurale u dorëzuan Prokurorisë së Durrësit për hetime të mëtejshme. Balliu përballet me akuzat për “Përvetësim të parave ose mallrave që rrjedhin nga veprimtaria kriminale”, “Mosdeklarim në kufi i të hollave dhe sendeve me vlerë”, si dhe “Kontrabandë me mallra për të cilat paguhet akcizë”.
©️zërionline
