Prej pesë ditësh, anija turke e kontenierëve që mban mbetje toksike qëndron në ujërat e portit të Durrësit, pasi ende nuk është gjetur një vend i përshtatshëm për depozitimin e tyre. Institucionet përgjegjëse deri më tani nuk kanë marrë përsipër të ofrojnë një zgjidhje për largimin e materialeve të rrezikshme nga porti, duke shkaktuar shqetësim të madh për ndikimin e mundshëm në mjedis dhe shëndetin publik.
Autoriteti Portual Durrës njoftoi sot se në lidhje me anijen tregtare “Moliva,” është në zbatim një urdhër ekzekutimi nga Prokuroria e Durrësit. Në bashkëpunim me institucionet ligjzbatuese dhe organet e tjera përkatëse, Autoriteti është duke punuar për përgatitjen e një vendi depozitimi të sigurt që përmbush kushtet e nevojshme për sigurinë mjedisore dhe fizike.
Autoriteti Portual thekson gatishmërinë për të ofruar informacion shtesë dhe për të bashkëpunuar në përputhje me ligjin për të drejtën e informimit, ndërsa situata vijon të monitorohet nga afër për të siguruar një zgjidhje të qëndrueshme për mbetjet toksike që ndodhen në port.
©️zërionline
