Sot, Durrësi u bë dëshmitar i një aktiviteti të rëndësishëm në kuadër të 24-vjetorit të miratimit të Rezolutës 1325 të Këshillit të Sigurimit të OKB-së për “Gruan, Paqen dhe Sigurinë”. Aktiviteti u organizua nga Shoqata “Gender, Paqe e Siguri” në sheshin “Liria”, duke bashkuar qytetarë, aktivistë dhe përfaqësues të institucioneve për të diskutuar rolin e rëndësishëm të grave në ndërtimin e paqes dhe përfshirë qytetarët në dhënien e mesazheve dhe ndarjen e problematikave me të cilat ndeshen brenda mureve të shtëpisë dhe në shoqëri.
Gjatë këtij eventi, pjesëmarrësit theksuan se angazhimi i grave në proceset e paqes është thelbësor, pasi studimet tregojnë se marrëveshjet që përfshijnë gra kanë më shumë mundësi të zgjasin dhe të jenë të qëndrueshme. Aktivistët ndanë perspektivat e tyre mbi sfidat me të cilat përballen gratë në shoqëri dhe theksuan nevojën për të adresuar këto probleme përmes politikave dhe iniciativave të vazhdueshme.
Në fjalën e saj, drejtoresha ekzekutive e shoqatës “Gender, Paqe e Siguri”, znj. Bajana Çeveli, organizatore e aktivitetit theksoi:
“Gratë sjellin një perspektivë unike në proceset e paqes, duke u fokusuar në pajtimin, uljen e tensioneve, edukimin dhe zhvillimin ekonomik.”
Ajo gjithashtu theksoi rëndësinë e bashkëpunimit mes institucioneve dhe organizatave të shoqërisë civile për të forcuar kapacitetet dhe çuar përpara agjendën globale “Gruaja, Paqja dhe Siguria”.
Më tej, Çeveli u shpreh se ka ardhur koha të nismohet sërish amnistia që nxit dorëzimin e armëve të zjarrit që ende ndodhet në duart e popullatës dhe rrezik prezent për krime kundër personit, duke nisur nga ato brenda familjes.
Ky aktivitet ndërgjegjësues u organizua në Durrës nga shoqata, që me mbështetjen e UN Women, Ambasadave dhe OSBE-së, i dha zë dhe jetë në Shqipëri Rezolutës 1325, duke arritur në kurorëzimin e përpjekjeve të saj për angazhimin e Qeverisë shqiptare dhe shoqërisë civile në hartimin dhe zbatimin e të parit Plan Kombëtar të Veprimit. Sot, Shqipëria është në Planin e dytë Kombëtar të Veprimit duke u kthyer në aktor që çon përpara agjendën botërore “Gruaja, Paqja dhe Siguria”.
Aktiviteti në këtë 24- vjetor të Rezolutës shërben edhe si një kujtesë për të gjithë se përfshirja e grave në vendimmarrje, në sektorët e sigurisë dhe në proceset e misionet paqeruajtëse është një proces në vazhdim, një hap kyç drejt një shoqërie më të sigurt dhe të drejtë. Pjesëmarrëset në aktivitet, përfshirë dhe nënkryetaren e Këshillit Bashkiak Denisa Luarasi dhe përfaqësuesen e Prefekturës Linda Zeka, u angazhuan për të vazhduar punën në këtë drejtim dhe për të siguruar që zëri i grave të dëgjohet dhe respektohet.
Me përfundimin e aktivitetit, organizatorët shprehën falenderime për pjesëmarrësit dhe përkushtimin e tyre në krijimin e një të ardhmeje më të mirë, ku dhuna dhe konfliktet të kenë zero tolerancë.
Gjithçka u mbyll me shpërndarjen e fletushkave informuese mbi rezolutën dhe tollumbacet e bardha, që shpërndanë simbolikisht mesazhin e paqes dhe sigurisë.
©️zërionline
