Një ikonë e skenës së qytetit bregdetar e më gjerë, aktori i humorit Muharrem Hoxha, që e ka bërë publikun të qeshë dhe të emocionohet ndër dekada, feston sot 74-vjetorin e lindjes.Në këtë 5 nëntor, Teatri i Durrësit, po jo vetëm, uroi duke kujtuar me respekt dhe dashuri aktorin e humorit Muharrem Hoxha.
I lindur më 5 nëntor 1950 në Durrës, Muharrem Hoxha nisi rrugëtimin e tij artistik që nga vitet e rinisë, fillimisht si amator në Pallatin e Rinisë, për të vazhduar më pas si profesionist në estradën e Durrësit, të njohur dikur si Teatri i Varietesë. Që nga viti 1973 e deri në pensionin e tij në 2015, Hoxha ishte pjesë e pandashme e trupës, duke sjellë gëzim dhe humor për publikun e tij besnik.
Në kujtimet e tij, aktori rrëfen se ishte Fadil Hasa, një tjetër emër i shquar i humorit durrsak, që i hapi dyert në estradë. Hoxha kujton se si Fadili e mori me vete nga një ndërmarrje në tjetrën për të performuar dhe shprehet se kjo periudhë ishte nga më të bukurat e jetës së tij.
“Kudo shkonte Fadili, shkoja edhe unë,” thotë ai me nostalgji.
Muharrem Hoxha nuk ishte thjesht një aktor, por një shok dhe bashkëpunëtor besnik për kolegët e tij në skenë. Ai gjen rastin t’i falenderojë të gjithë, që nga Gjergj Vlashi, Enver Plaku, Aishe Stari, Roland Koça dhe deri tek regjisori Haxhi Rama, duke e cilësuar si një periudhë të artë të jetës së tij profesionale bashkëpunimin me ta.
Me këtë përkujtim të përzemërt në rrjetin social Facebook, Teatri i Durrësit shpreh mirënjohjen për një artist që e bëri humorin pjesë të përditshmërisë së durrsakëve dhe që gjithmonë do të mbetet një ikonë e paharruar e skenës.
Edhe ne të Zëri Online urojmë Muharrem Hoxhën në këtë përvjetor, me shpresën që humori, mirësia dhe pasioni i tij të jenë të pranishme në skenë dhe të frymëzojnë breza të rinj artistësh.
©️zërionline
