Operacioni policor i koduar “Konfiskimi” ka çuar në sekuestrimin e disa pasurive të paluajtshme, të përfituara nga veprimtaria kriminale e shtetasit Alket Hatija, i dënuar me 20 vite burg nga drejtësia italiane për trafikim të lëndëve narkotike.
Sipas njoftimit zyrtar, Sektori për Hetimin e Krimeve Ekonomiko-Financiare në DVP Durrës, në bashkëpunim me Agjencinë e Administrimit të Pronave të Konfiskuara dhe Sekuestruara, ka ekzekutuar vendimin e Gjykatës së Posaçme për Korrupsionin dhe Krimin e Organizuar për konfiskimin e këtyre pasurive: një sipërfaqe toke truall, një garazh dhe një apartament në Durrës, si dhe një apartament në Kavajë. Prona këto, të regjistruara në emër të Hatijas dhe familjarëve të tij, dyshohet se janë përfituar nga aktivitetet e tij kriminale.
Alket Hatija, gjatë viteve 2003-2004, drejtoi një rrjet të fuqishëm trafikimi heroine nga Shqipëria drejt Italisë. Ai dhe bashkëpunëtorët e tij transportonin me automjete ndërkombëtare sasi të mëdha heroine, me dërgesa që arrinin deri në 10 kilogramë në secilin rast.
Operacioni “Konfiskimi” është pjesë e përpjekjeve të autoriteteve për të goditur përfitimet financiare të grupeve kriminale dhe për të dërguar një mesazh të qartë: asnjë pasuri e krijuar nga krimi nuk do të tolerohet. Materialet procedurale tashmë i janë dorëzuar Prokurorisë për veprime të mëtejshme ligjore.
©️zërionline
