Kjo e diel e parë e vitit 2025 ka sjellë një atmosferë plot gjallëri në plazhin e Durrësit. Pavarësisht motit të freskët dhe temperaturave të janarit që variuan nga 10-13 gradë Celsius, qytetarë të shumtë kanë zgjedhur ta kalojnë ditën pranë detit, duke shijuar ajrin e pastër e të jodizuar, motin e kthjellët e plot diell dhe qetësinë e fillimvitit.
Në një vëzhgim të bërë nga Zëri Online gjatë paradites, plazhi u mbush me familje, të rinj dhe të moshuar që shëtisnin përgjatë bregut, disa të mbështjellë me xhupa, të tjerë me veshje të lehta dhe sportive. Nuk munguan as turistët e huaj, disa prej të cilëve dhe u zhveshën.
Për disa, kjo ishte një mundësi për reflektim e qetësi, ndërsa për të tjerë, një traditë e hershme për të nisur vitin pranë natyrës.
Një qytetar, i cili shëtiste me familjen, u shpreh:
“Pavarësisht dimrit, deti ka një tërheqje të veçantë. Na ndihmon të pastrojmë mendjen dhe të fillojmë vitin me energji pozitive.”
Ndërkohë, kushtet e motit ishin ideale për një shëtitje dimërore: temperatura të freskëta, por pa erë të fortë, dhe një qiell i kthjellët.
Qetësia e dallgëve që përplaseshin butësisht mbi rërën e ftohtë dhe zërat e fëmijëve që luanin krijuan një peizazh plot jetë të dimrit në bregdet.
Edhe në dimër, qytetarët e frekuentojnë masivisht bregdetin e Durrësit duke gjetur mënyra për t’u lidhur me natyrën dhe për të festuar fillimin e një viti të ri. Një traditë që ngjall optimizëm dhe një kujtesë se plazhi nuk është vetëm destinacion i verës, por edhe i argëtimit dimëror buzë Adriatikut.
©️zërionline
