Simon Sholla, një i ri 21-vjeçar nga Kolonja e Lushnjës, është gjetur i pajetë mëngjesin e sotëm rreth orës 09:55 në tualetin e konviktit të shkollës teologjike ortodokse “Kryqi i Nderuar” në Gjirokastër. Trupi i tij u pikas nga nxënës të tjerë, të cilët vunë re vonesën e tij të pazakontë në tualet. Pas konstatimit, është njoftuar menjëherë drejtoria e shkollës dhe policia.
Simon Sholla kishte mbërritur vetëm në fundjavë në kuadër të një programi dhe ka qëndruar për të fjetur në konviktin e shkollës, ku ka kryer studimet e mesme. I riu kishte një histori të vështirë jete, pasi që në moshë të vogël jetonte bashkë me motrën e tij në Shtëpinë e Shpresës në Shënavlash, Durrës, një strehë përkujdesjeje për fëmijë jetimë ose me probleme sociale. Pas përfundimit të shkollës së mesme në Gjirokastër, ai nisi studimet teologjike në Durrës.
Marrëdhëniet e tij me prindërit ishin të komplikuara dhe nga të dhënat e mbledhura nga policia në Gjirokastër rezulton se ai përballej me sfida të mëdha emocionale, përfshirë vetminë dhe pasojat e dramës familjare.
Gjatë kontrollit në dhomën e tij, policia gjeti një sasi antidepresantësh pranë shtratit, duke ngritur dyshime se një mbidozë e mundshme e medikamenteve mund të ketë qenë shkaku i vdekjes. Trupi i tij u transportua në morgun e qytetit ku po kryhet ekspertiza mjeko-ligjore për të përcaktuar shkakun e saktë të ndarjes nga jeta.
Sipas dëshmive të personave që e njihnin, Simon Sholla kishte tentuar disa herë të merrte ndihmë psikologjike dhe të gjente një vend pune. Ai ishte një i ri i talentuar, fliste disa gjuhë dhe ishte një besimtar i devotshëm i besimit ortodoks.
Në lidhje me ngjarjen, burime nga Durrësi bëjnë me dije se Simon Sholla kishte pësuar një trombozë të këmbës disa ditë më parë dhe ishte vizituar te një mjek në Gjirokastër, ku kishte marrë mjekim. Dyshimet në Durrës lidhen me mundësinë e një tromboze tjetër ose një kundërveprimi mes medikamenteve, duke përjashtuar hipotezën e vetëvrasjes me ilaçe, për shkak të njohjes së tij si një person i përkushtuar ndaj jetës.
©️zërionline
