Pavarësisht legjislacionit ekzistues që garanton pjesëmarrjen e qytetarëve në proceset vendimmarrëse, zbatimi i ligjit për Konsultimin Publik në nivel vendor vazhdon të jetë një sfidë për Bashkinë Durrës. Një raport i fundit i përgatitur nga Qendra e Zhvillimit të Shoqërisë Civile (CSDC) në Durrës nxjerr në pah mungesën e transparencës, dobësitë në proceset konsultative dhe nevojën për një llogaridhënie më të mirë nga pushteti vendor.
Raporti, i cili përfshin periudhën maj – korrik 2024, thekson se qytetarët ende nuk kanë një platformë efektive për të shprehur zërin e tyre dhe për të ndikuar në politikat vendore. Kjo përbën një pengesë të madhe për përparimin, progresin e demokracisë lokale dhe për realizimin e prioriteteve të Kontratës Sociale 2023–2027, e cila ka në thelb forcimin e demokracisë vendore dhe avancimin e agjendës së integrimit evropian.
Gjetjet kryesore të raportit
Raporti i CSDC-së ka identifikuar disa fusha kritike ku kërkohen ndërhyrje të menjëhershme:
– Mungesa e ndërgjegjësimit: Shumë qytetarë dhe institucione vendore janë të paqarta mbi detyrimet dhe të drejtat e tyre në proceset e konsultimit publik.
– Transparenca e kufizuar: Pushteti vendor nuk po zbaton në mënyrë të plotë ligjin, duke mos ofruar informacione të mjaftueshme për vendimet që prekin komunitetin.
– Përfshirja qytetare: Proceset vendimmarrëse shpesh kryhen pa një përfaqësim të gjerë dhe gjithëpërfshirës të komunitetit lokal.
Në përgjigje të këtyre sfidave, u lançua nisma “POP 2024: Rrjeti POP për Qeverisje të Mirë dhe Integritet,” e mbështetur nga Olof Palme International Centre dhe Suedia. Kjo nismë synon të forcojë angazhimin qytetar dhe të promovojë praktikat më të mira të qeverisjes vendore.
Në kuadër të kësaj nisme, CSDC ka organizuar takime me përfaqësues të Bashkisë Durrës, Këshillit Bashkiak, organizata të shoqërisë civile dhe aktivistë rinorë, ku janë ndarë gjetjet dhe rekomandimet e raportit “Transparenca dhe Përgjegjësia në Nivel Vendor.”
Çfarë pritet më tej?
Zbatimi i plotë i ligjit për Konsultimin Publik është jetik për të siguruar që qytetarët të jenë pjesë aktive e vendimmarrjes. Për këtë, kërkohet:
– Rritja e ndërgjegjësimit publik: Informimi i qytetarëve për të drejtat e tyre dhe për rëndësinë e pjesëmarrjes në proceset konsultative.
– Transparencë dhe llogaridhënie: Pushteti vendor duhet të jetë më i hapur dhe më i përgjegjshëm ndaj kërkesave dhe prioriteteve të komunitetit.
– Advokimi i shoqërisë civile: Organizatat e shoqërisë civile duhet të vazhdojnë të luajnë një rol aktiv në monitorimin e procesit dhe në nxitjen e ndryshimeve.
Kjo është një mundësi për Durrësin që të vendosë një standard të ri për demokracinë vendore, ku qytetarët janë jo vetëm përfitues të politikave publike, por edhe pjesëmarrës aktivë në hartimin e tyre. Zëri i qytetarëve është një aset i çmuar për një qeverisje më të mirë dhe është koha që të dëgjohet me seriozitet.
©️zërionline
