Uji është tërhequr nga zonat e prekura nga përmbytjet, por pasojat brenda banesave dhe bizneseve mbeten të rënda. Banorët po përpiqen të shpëtojnë ç’të mundin nga orenditë dhe pajisjet e dëmtuara, ndërsa shumë prej tyre kërkojnë mbështetje financiare për zëvendësimin e pajisjeve të dala jashtë përdorimit. Ekipet në terren po vijojnë evidentimin e dëmeve. Deri tani janë verifikuar 381 banesa të përmbytura, ndërsa shumë të tjera mbeten ende për t’u kontrolluar.
Një nga godinat e prekura ishte edhe burgu i Durrësit, ku situata tashmë është normalizuar. Në ditët e para të përmbytjes, 29 të paraburgosur u zhvendosën në katin e dytë të godinës për t’u mbrojtur nga uji, për t’u transferuar më pas në burgun e Fushë-Krujës. Kjo masë u mor për të mundësuar ndërhyrjet në sistemin e pusetave dhe kanalizimeve dhe për të shmangur përsëritjen e situatave të ngjashme në vazhdim.
Masat për të parandaluar përmbytjet
Për të shmangur një krizë të ngjashme në të ardhmen, duhet një plan masash, duke nisur nga pastrimi dhe mirëmbajtja e kanaleve kulluese, të cilat shpesh bllokohen nga mbetjet urbane dhe plastika. Kjo ndërhyrje synon të rrisë kapacitetin e kullimit të ujërave dhe të parandalojë përmbytjet gjatë reshjeve të dendura.
Një tjetër prioritet do të jetë përmirësimi i sistemit të drenazhimit urban, si dhe sistemimi i pusetave dhe infrastrukturës së kanalizimeve në zonat më të rrezikuara, përfshirë burgun e Durrësit. Përveç këtyre masave, autoritetet duhet të shqyrtojnë dhe mundësinë e ngritjes së një sistemi të përmirësuar për ndërhyrjet emergjente për të minimizuar dëmet në rast përmbytjesh.
©️zërionline
