Maturantët shqiptarë që duhet të plotësojnë sot formularin A1 në platformën e-albania po përballen me probleme serioze teknike, duke vënë në rrezik regjistrimin e tyre në provimet e Maturës Shtetërore.
Përveçse sistemi ka qenë i paarritshëm për orë të tëra, edhe kur platforma hapet, disa nga pikat e detyrueshme të formularit mbeten të paaktivizuara, duke e bërë të pavlefshëm aplikimin. Kjo situatë ka krijuar pasiguri dhe shqetësim tek maturantët dhe familjet e tyre, pasi sot është e vetmja datë e përcaktuar për të përfunduar procesin.
Nxënësit dhe prindërit kërkojnë një reagim urgjent nga Ministria e Arsimit, duke kërkuar ose një zgjidhje të menjëhershme për defektet teknike ose një shtyrje të afatit, për të mos penalizuar maturantët për një problem që nuk është në dorën e tyre.
Pa një ndërhyrje të shpejtë, shumë maturantë rrezikojnë të mos regjistrohen në provimet e maturës, duke vënë në rrezik të ardhmen e tyre akademike.
©️zërionline
