Korrupsion dhe sabotim të hetimeve, pranga policit. AMP: SPAK të hetojë për skemën e kontrabandës me naftë në Durrës

Një punonjës policie është arrestuar dhe disa persona janë shpallur në kërkim pas një operacioni të Agjencisë së Mbikëqyrjes Policore (Rajoni Durrës-Kavajë) në bashkëpunim me Seksionin për Hetimin e Krimeve Ekonomike dhe Financiare në Drejtorinë Vendore të Policisë Durrës.

Operacioni i koduar “TURNI” çoi në ndalimin e inspektorit Armand Marvataj, 21 vjeç, punonjës i Patrullës së Përgjithshme në Komisariatin e Policisë Durrës, i cili akuzohet për “Shpërdorim detyre” dhe “Korrupsion pasiv i personave që ushtrojnë funksione publike”. Gjithashtu, janë shpallur në kërkim J. Koka, 31 vjeç dhe D. M., 34 vjeç, të dyshuar për “Kontrabandë me mallra që paguhet akcizë”, “Vjedhje e kryer në bashkëpunim” dhe “Korrupsion aktiv i personave që ushtrojnë funksione publike”.

Nafta e sekuestruar u zëvendësua me ujë

Sipas hetimeve, më 27 janar 2025, rreth orës 15:00, të arrestuarit dhe personat në kërkim kanë nxjerrë një sasi të konsiderueshme nafte nga anija “AYA ZANOYBYA”, me flamur të Tanzanisë, e cila ishte e ankoruar dhe e sekuestruar në Porto Romano si provë materiale nga Prokuroria e Durrësit.

Inspektori Armand Marvataj dyshohet se ka marrë 10,000 euro ryshfet nga shtetasi Juxhin Koka, për të lejuar nxjerrjen e naftës në bashkëpunim me pjesëtarë të ekuipazhit të anijes. Hetimet zbuluan se sasia e naftës në anije ishte zëvendësuar me ujë për të fshehur krimin.

Autoritetet kanë kryer një sërë veprimesh hetimore, përfshirë këqyrjen e anijes, analizimin e pamjeve filmike në Porto Romano dhe marrjen e mostrave nga rezervuarët e anijes për ekspertizë.

Në vijim të hetimeve, janë proceduar në gjendje të lirë edhe 7 persona të tjerë, mes tyre katër shtetas sirianë dhe një egjiptian, të dyshuar për përfshirje në këtë skemë:

1. L. K., 29 vjeç
2. F. I., 23 vjeç (shtetas sirian)
3. A. Sh., 22 vjeç (shtetas sirian)
4. S. Sh., 25 vjeç (shtetas sirian)
5. H. B., 47 vjeç (shtetas sirian)
6. S. B., 53 vjeç (shtetas egjiptian)
7. W. B., 42 vjeç (shtetas sirian)

Materialet procedurale janë referuar në Prokurorinë e Posaçme Kundër Korrupsionit dhe Krimit të Organizuar (SPAK) për hetime të mëtejshme.

AMP ka deklaruar se mbetet e angazhuar në luftën kundër korrupsionit dhe fton qytetarët të denoncojnë çdo rast abuzimi apo shkelje të ligjit nga punonjësit e strukturave shtetërore.

©️zërionline