Një konflikt mes disa shtetasve në lagjen nr. 18 të Durrësit përshkallëzoi në përdorimin e armëve të zjarrit, por ndërhyrja e shpejtë e Policisë parandaloi një përplasje më të rëndë.
Sipas njoftimit zyrtar, pas marrjes së informacionit në sallën operative, shërbimet e Policisë mbërritën menjëherë në vendngjarje për të neutralizuar situatën. Dy prej personave të përfshirë, Hamdi Llana dhe Klajdi Senko, u larguan me shpejtësi me një automjet pasi kishin qëlluar në ajër me armë zjarri kallashnikov. Ata janë identifikuar dhe shpallur në kërkim.
Nga hetimet paraprake rezultoi se Llana dhe Senko ishin konfliktuar për motive të dobëta me shtetasin Gentian Zeneli, të cilin e kishin sulmuar me sende të forta. Për ta kërcënuar, ata qëlluan me armë zjarri në ajër.
Në vijim të veprimeve hetimore, Policia ka arrestuar tre persona të tjerë:
- Gentian Zeneli, 48 vjeç, banues në Durrës, për veprën penale “Moskallëzimi i krimit”.
- Spiro Shore, 38 vjeç, banues në Durrës, për veprat penale “Veprime që pengojnë zbulimin e së vërtetës” dhe “Moskallëzimi i krimit”.
- Jolanda Zeqiri, 26 vjeçe, banuese në Durrës, për veprën penale “Veprime që pengojnë zbulimin e së vërtetës”.
Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Durrës për veprime të mëtejshme, ndërsa Policia po vijon kërkimet për kapjen e dy të shpallurve në kërkim.
©️zërionline
