Një tjetër hap i rëndësishëm është shënuar në operacionin policor “Turni”, i cili vazhdon të zbulojë skemën e vjedhjes së karburantit nga një anije e sekuestruar në Porto Romano. Specialistët e Seksionit për Hetimin e Krimeve Ekonomike dhe Financiare, në bashkëpunim me Seksionin për Mbështetjen Operacionale të DVP Durrës dhe Agjencinë e Mbikëqyrjes Policore (Rajoni Durrës-Kavajë), kanë arrestuar një nga personat e shpallur në kërkim për këtë çështje.
I ndaluari është 34-vjeçari Drilon Malluta, banues në Durrës, i dyshuar për një seri veprash penale, përfshirë “Kontrabandë me mallra që paguhet akcizë”, “Korrupsion aktiv i personave që ushtrojnë funksione publike” dhe “Vjedhje” në bashkëpunim. Ai akuzohet se ka bashkëpunuar me inspektorin e policisë Armand Marvataj, tashmë i arrestuar, Juxhin Koka (ende në kërkim) dhe pjesëtarë të ekuipazhit të anijes për të vjedhur një sasi të konsiderueshme nafte.
Anija, e cila u sekuestrua nga Prokuroria e Durrësit si provë materiale, ishte ankoruar në Porto Romano kur ndodhi vjedhja. Hetimet e deritanishme tregojnë për një skemë të mirëorganizuar, ku të dyshuarit shfrytëzuan pozitat e tyre për të realizuar kontrabandën.
Operacioni vijon me intensitet të lartë, ndërsa policia është në ndjekje të personit tjetër të shpallur në kërkim. Ndërkohë, materialet procedurale do t’i referohen Prokurorisë së Posaçme Kundër Korrupsionit dhe Krimit të Organizuar (SPAK) për hetime të mëtejshme.
©️zërionline
