Policia e Durrësit ka finalizuar operacionin e koduar “Ghost”, duke arrestuar një 28-vjeçar të shpallur në kërkim ndërkombëtar nga autoritetet spanjolle. I dyshuari, Ilirjan Mici, banues në fshatin Likmetaj, Durrës, akuzohet si pjesëtar i një organizate kriminale që trafikonte lëndë narkotike dhe pastronte paratë e përfituara nga aktiviteti i paligjshëm.
Operacioni u zhvillua nga Shërbimet Operacionale të Policisë së Durrësit, në bashkëpunim me Seksionin për Hetimin e Narkotikëve, pas informacioneve të siguruara nga inteligjenca policore mbi vendndodhjen e të kërkuarit.
Sipas Gjykatës së Madridit, Spanjë, e cila ka lëshuar një urdhër arresti më 28 dhjetor 2023, i riu do të përballet me drejtësinë spanjolle që parashikon një dënim maksimal deri në 26 vite burgim, për akuzat “Organizatë kriminale”, “Trafikim i narkotikëve” dhe “Pastrimi i produkteve të veprës penale”, sipas legjislacionit spanjoll.
Interpol Tirana dhe Interpol Madridi po ndjekin procedurat për ekstradimin e tij në Spanjë.
©️zërionline
