Godina e ish-Komandës së Gardës së Republikës do të transformohet në qendrën kulturore “Trashëgimia për të gjithë – Garda”, falë bashkëpunimit mes Bashkisë së Tiranës dhe Qendrës Shqiptare të Trashëgimisë. Kjo qendër do të promovojë traditën, kulturën dhe artin shqiptar, duke ofruar hapësira për ekspozita, aktivitete artistike dhe edukative.
Kryeministri Edi Rama, gjatë inspektimit të punimeve, e cilësoi këtë muze si një “atraksion të jashtëzakonshëm”, ku do të ekspozohen medalje, flamuj dhe objekte historike që pasqyrojnë periudha të ndryshme të shtetit shqiptar. Koleksionisti Artan Lame sqaroi se ekspozita do të përfshijë hapësira të përhershme dhe tematike, një laborator restaurimi dhe një bibliotekë albanologjike.
Nënkryetarja e Bashkisë, Anuela Ristani, theksoi se funksionimi i qendrës do të jetë i ngjashëm me Piramidën, me një bord që menaxhon aktivitetet. Pritet që muzeu të hapet në mars, për të qenë gati për sezonin turistik.
©️zërionline
