Kushtet e përkeqësuara hidrometeorologjike në Adriatik kanë ndikuar në lundrimin e mjeteve të vogla dhe anijeve të peshkimit në Durrës. Gjiri i Durrësit është përfshirë nga moti i paqëndrueshëm, i shoqëruar me reshje shiu të herëpashershme dhe erë. Për pasojë, flota e peshkimit është kthyer në port, duke pritur përmirësimin e motit në det të hapur.
Sipas Kapitenerisë së portit detar Durrës, kjo situatë nuk ndikon në lundrimin e trageteve që lidhin Durrësin me portet italiane të Barit dhe Ankonës. Megjithatë, anijet e peshkimit dhe mjetet e tonazhit të ulët janë urdhëruar të mos lundrojnë deri në stabilizimin e kushteve atmosferike.
Autoriteti detar u ka kërkuar operatorëve të marrin masa sigurie për të shmangur rreziqet. Ndërkohë, era fryn në drejtimin jug-juglindje me një forcë në rritje prej 5-6 ballë në det të hapur.
Sipas parashikimeve, përmirësimi i situatës pritet të ndodhë të premten, më 14 mars, pikërisht në Ditën e Pranverës.
©️zërionline
