Pas një seance maratonë që u shtri në tri ditë, Gjykata e Apelit të Posaçëm dha vendimin. Kryebashkiaku i Tiranës, Erion Veliaj, mbetet në burg, pasi Apeli i Posaçëm la në fuqi vendimin e Gjykatës së Posaçme për Krimin dhe Korrupsionin e Organizuar.
Ndonëse Veliaj kundërshtoi provat e reja të SPAK-ut, përgjimet, dhe kërkoi heqje të arrestit në burg pasi nuk është i rrezikshëm dhe nuk ka rrezik për t’u larguar, apo të dëmtojë provat, Apeli vendosi të lërë në fuqi masën e arrestit me burg.
Veliaj akuzohet për veprat penale të “korrupsionit pasiv të funksionarëve të lartë shtetërorë ose të zgjedhurve vendorë”, në 9 raste si dhe “pastrimit të produkteve të veprës penale ose veprimtarisë kriminale”.
Biznesmenin Elman Abule Apeli i Posaçëm e la në arrest shtëpie, ndërsa në seancën qe u mbajt pak më herët për Ajola Xoxën, u la në fuqi vendimi për sekuestron preventive ndaj llogarive bankare të saj. Sipas hetimeve të SPAK, përmes 8 bizneseve dhe OJF-ve të Ajola Xoxës dhe të Elman Abules u gjeneruan 1.1 mln euro. Të gjitha këto biznese dhe OJF, tashmë të futura në regjistrin e veprave penale, përdoreshin sipas SPAK që përmes transaksioneve të ndryshme të futnin në sistemin bankar paratë e fituara. Ky qëllim sipas SPAK do të ishte i pamundur pa bashkëpunimin e Elman Abules dhe familjarëve të tij.
©️zërionline
