Në fillim të vitit 2025, kompania kineze Shandong Shuntian Chemical Group, e vendosur në provincën lindore Shandong, lëshoi një njoftim të brendshëm që kërkonte nga të gjithë punonjësit e pamartuar, të moshës 28 deri në 58 vjeç, përfshirë ata të divorcuar, të martoheshin dhe të krijonin familje deri në 30 shtator 2025. Në të kundërt, kompania paralajmëroi se do të ndërpriste kontratat e punës së tyre.
Ky vendim u justifikua nga kompania me promovimin e vlerave kulturore si “virtyti, besnikëria dhe drejtësia”, duke argumentuar se martesa dhe krijimi i familjes janë pjesë e këtyre vlerave. Megjithatë, njoftimi shkaktoi reagime të ashpra në rrjetet sociale dhe u kritikua gjerësisht nga publiku. Përballë kritikave dhe pasi autoritetet lokale konstatuan se kërkesa e kompanisë shkelte ligjet e punës në Kinë, Shandong Shuntian Chemical Group u detyrua të tërhiqte njoftimin dhe t’i nënshtrohej “korrigjimit”.
Ky incident ndodhi në një kohë kur Kina po përballet me një rënie të ndjeshme të numrit të martesave dhe lindjeve. Në vitin 2024, vetëm 6.1 milionë çifte u martuan, një rënie prej 20% krahasuar me vitin 2023, duke shënuar numrin më të ulët që nga viti 1986. Për të adresuar këtë trend, autoritetet kineze kanë ndërmarrë masa të ndryshme, duke përfshirë promovimin e “edukimit për dashurinë” në kolegje dhe universitete, me qëllim nxitjen e pikëpamjeve pozitive mbi martesën, dashurinë, pjellorinë dhe familjen.
Megjithatë, përpjekjet e kompanive për të ndikuar në jetën personale të punonjësve, siç ishte rasti i Shandong Shuntian Chemical Group, janë kritikuar ashpër dhe konsiderohen si shkelje të të drejtave të punonjësve. Ky rast nxjerr në pah tensionet midis politikave shtetërore për të rritur normat e martesës dhe lindshmërisë dhe të drejtave individuale të qytetarëve.
©️zërionline
