Tragjedia që goditi mbrëmjen e kaluar fshatin Stom Golem të Shkodrës ka marrë përmasat më të dhimbshme të mundshme. Pas vdekjes në vend të një 16-vjeçari, ka ndërruar jetë sot në spital edhe i mituri tjetër, vetëm 13 vjeç, i cili ndodhej në gjendje të rëndë shëndetësore.
Të dy të miturit po ktheheshin me motor nga stërvitja, pasi ishin pjesë e një akademie futbolli në Shkodër. Ata humbën kontrollin e mjetit dhe u përplasën me një mur. Fatkeqësisht, përplasja rezultoi fatale për të dy.
Klubi i tij, “Djelmnia Shkodrane U13”, ka shprehur dhimbjen për humbjen e talentit të ri Fabian Shpati me një mesazh prekës:
“Sot zemrat tona janë të thyera… U nda nga jeta shumë herët, në moshën vetëm 13-vjeçare, Fabian Shpati, një djalë i artë dhe futbollist i talentuar. Një engjëll në fushë, gjithmonë me buzëqeshje, pasion dhe shpirt gare. Ikja jote e parakohshme na ka lënë pa fjalë, por kujtimi yt do të jetojë gjithmonë në zemrat tona. Pushofsh në paqe Fabian, fushat e parajsës tashmë kanë një kampion më shumë.”
Një dhimbje e rëndë për familjet, komunitetin dhe botën e sportit në Shkodër.
©️zërionline
