Pas ndarjes nga jeta të Papa Françeskut, bota kujton mesazhet e tij të përulësisë, dashurisë dhe paqes. Në këtë reflektim të përbotshëm, një detaj i veçantë vjen nga Shqipëria: një pullë përkujtimore e emetuar nga Posta Shqiptare më 21 shtator 2014, në nder të vizitës së tij historike në vendin tonë. Ky nderim, bërë që në gjallje të Atit të Shenjtë, mbetet dëshmi e respektit dhe lidhjes së ngrohtë që Shqipëria krijoi me Papa Françeskun.
Ai ishte Papa i dytë që vizitoi Shqipërinë, pas Papa Gjon Palit II në vitin 1993, dhe shtegtimi i tij në Tiranë ishte i pari në një vend evropian dhe ballkanik. Ndër dhjetëra vende që e kishin ftuar, Papa Françesku zgjodhi pikërisht Shqipërinë, duke theksuar se ishte ndër më të vuajturat, e larë me gjakun e martirëve që sakrifikuan për fenë, lirinë dhe bashkëjetesën ndërfetare.
Pulla përkujtimore, me përmasa 31 x 43 mm dhe autor Petraq Papën, përbën një krijim simbolik që lidh të kaluarën e krishterë të Shqipërisë me figurën e Papa Françeskut. Ajo pasqyron edhe lidhjen historike të vendit me krishtërimin që para pushtimit osman, përmes figurës së Skënderbeut, mbrojtës i Evropës së krishterë nga rreziku otoman.
Ky nderim filatelik nuk ishte thjesht një veprim ceremonial, por një mesazh i qartë se Shqipëria e çmoi vizitën e Papa Françeskut dhe mesazhin e tij për paqe, respekt dhe bashkëjetesë. Sot, pas ndarjes nga jeta të Atit të Shenjtë, kjo pullë merr një vlerë edhe më të madhe, si dëshmi e vërtetë që Shqipëria e ka nderuar Papën që në gjallje, duke e vendosur në mozaikun e figurave historike që kanë lënë gjurmë në zemrën e kombit.
Vali Qyrfyçi
©️zërionline
