Ish-drejtoresha e Spitalit Rajonal të Peshkopisë, Irini Shehu, është lënë në arrest shtëpie me vendim të Gjykatës së Rrethit Gjyqësor Dibër, pas një incidenti të ndodhur pak ditë më parë në ambientet e spitalit.
Shehu u paraqit në spital dhe kërcënoi drejtorin aktual, Rruzhdi Defa, si dhe disa punonjës të tjerë të institucionit, të cilët e denoncuan menjëherë në polici. Ajo u arrestua në flagrancë nga forcat e rendit.
Ky nuk është incidenti i parë ku përfshihet Shehu. Dy muaj më parë, ajo goditi me send metalik, kapësen e letrave, shefin e financës së spitalit, Shaban Uklala. Pas kësaj ngjarjeje, Ministria e Shëndetësisë reagoi menjëherë duke e shkarkuar nga detyra, ndërsa gjykata urdhëroi ndalimin e ushtrimit të profesionit si mjeke në këtë institucion.
Ngjarja e fundit e ka përkeqësuar edhe më tej situatën ligjore të ish-drejtoreshës, e cila tashmë përballet me masa të reja sigurie dhe një hetim penal në vijim.
©️zërionline
