Një aksident tragjik ka ndodhur pasditen e sotme në zonën e Golemit, ku një 62-vjeçar ka humbur jetën teksa punonte në një objekt ndërtimi. Ngjarja ka ndodhur rreth orës 15:30, kur shtetasi I. P., rreth 62 vjeç, është rrëzuar nga një lartësi gjatë procesit të çmontimit të skelave të një pallati në Qerret të Kavajës.
Sipas informacioneve paraprake, dyshohet se aksidenti është shkaktuar nga rrëzimi i një trari prej druri, i cili ka goditur rëndë 62-vjeçarin. Ai është dërguar menjëherë në Urgjencën e Spitalit Rajonal të Durrësit, por ka mbërritur atje pa shenja jete. Burimet mjekësore bëjnë me dije se shkak për vdekjen janë bërë dëmtimet e shumta dhe hemoragjia e madhe e shkaktuar nga goditja fatale.
Nga i njëjti incident ka mbetur i dëmtuar lehtë edhe shtetasi S. H., i cili është plagosur në këmbë si pasojë e rënies së trarit.
Menjëherë pas ngjarjes, policia ka shoqëruar në Komisariat personat që ndodheshin në vendin e aksidentit për të marrë dëshmitë e tyre. Grupi hetimor ndodhet në terren dhe, nën drejtimin e Prokurorisë, po punon për zbardhjen e plotë të rrethanave të kësaj ngjarjeje të rëndë.
©️zërionline
